२६ भदौ, काठमाडौं। नेपाली कांग्रेसका सभापति गगनकुमार थापाले संविधान, पार्टी विधान र अदालतको फैसलाका कारण १५औँ महाधिवेशन तोकिएको समयभन्दा एक घण्टा पनि नसर्ने स्पष्ट पारेका छन्। असोज ३ र ४ गते वडा अधिवेशन तथा असोज १६ गतेबाट महाधिवेशनको प्रक्रिया सुरु हुने जानकारी दिँदै उनले महाधिवेशनबारे कुनै पनि अलमलमा नपर्न नेता-कार्यकर्ताहरूलाई आग्रह गरेका छन्।

महाधिवेशनलगत्तै नागरिकसँगको सम्बन्ध सुदृढ बनाउन र आन्तरिक एकता कायम राख्न ७७ वटै जिल्लामा पुग्ने बताउँदै थापाले संगठन सुदृढीकरणका लागि आफूले आवश्यकताअनुसार नरम र निर्मम दुवै नीति लिने स्पष्ट पारे।

यसैगरी, कार्यक्रममा उनले वर्तमान सरकार तथा प्रधानमन्त्रीको आर्थिक नीति र निजी क्षेत्रप्रतिको दृष्टिकोणको कडा आलोचना गरे। सरकारले स्पष्ट आर्थिक प्राथमिकता तय गर्न नसकेको र निजी क्षेत्रलाई विश्वासमा नलिएको आरोप लगाउँदै उनले २०४६ सालपछि अपनाइएको खुला तथा उदार अर्थतन्त्रको नीतिकै कारण मुलुकको आर्थिक विकास सम्भव भएको स्मरण गराए।