६ मंसिर , बारा। प्रधानमन्त्री वालेन्द्र शाह भारतीय प्रधानमन्त्री नरेन्द्र मोदीको मैत्रीपूर्ण निमन्त्रणामा भारतको दुईदिने राजकीय भ्रमणका लागि आज दिउँसो पौने २ बजे नेपाल वायुसेवा निगमको विमानमार्फत नयाँ दिल्ली प्रस्थान गर्दै हुनुहुन्छ। प्रधानमन्त्री पद सम्हालेपछि पहिलो पटक छिमेकी देशको भ्रमणमा जान लाग्नुभएका शाहको टोलीमा अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल, सल्लाहकारहरू, उच्चपदस्थ सरकारी अधिकारी, व्यवसायी र पत्रकारहरू सहभागी छन्।
नयाँ दिल्लीस्थित इन्दिरा गान्धी अन्तर्राष्ट्रिय विमानस्थलमा प्रधानमन्त्री शाहलाई भारतका वाणिज्य तथा उद्योग राज्यमन्त्री जितिन प्रसादले स्वागत गर्नुहुनेछ। भ्रमणको पहिलो दिन आजै भारतीय विदेशमन्त्री डा. एस जयशङ्करले प्रधानमन्त्री शाहसँग शिष्टाचार भेटवार्ता गर्ने कार्यक्रम रहेको छ।



भ्रमणको दोस्रो दिन भोलि प्रधानमन्त्री शाहले भारतीय समकक्षी नरेन्द्र मोदीसँग द्विपक्षीय भेटवार्ता तथा प्रतिनिधिमण्डलस्तरीय छलफल गर्नुहुनेछ। सोही दिन उहाँले भारतका राष्ट्रपति द्रौपदी मुर्मूसँग शिष्टाचार भेट गर्नुका साथै राजघाटस्थित महात्मा गान्धीको समाधिस्थलमा गई श्रद्धासुमन अर्पण गर्ने कार्यतालिका छ।
भ्रमणका क्रममा व्यापार, पारवहन, लगानी, ऊर्जा र सम्पर्क सञ्जाल विस्तारका विषयमा छलफल हुनुका साथै विभिन्न सम्पन्न परियोजनाको उद्घाटन र नयाँ परियोजनाको शिलान्यास गरिनेछ। साथै शिक्षा, स्वास्थ्य, कृषि, खेलकुद, विपद् व्यवस्थापनलगायतका क्षेत्रमा समझदारीपत्र (एमओयू) आदानप्रदान तथा नेपाल–भारत बिजनेस फोरमको कार्यक्रम सम्पन्न गरी प्रधानमन्त्री शाह भोलि बेलुका नियमित उडानमार्फत स्वदेश फर्कनुहुनेछ।









