१७असोज, बारा। तराई-मधेस र मिथिलाञ्चल क्षेत्रमा सन्तानको दीर्घायु, सुस्वास्थ्य र समृद्धिको कामना गर्दै मनाइने पवित्र जितिया (जिउतिया) पर्व आज धार्मिक तथा सांस्कृतिक विधिपूर्वक सुरु भएको छ। आमा र सन्तानबीचको प्रगाढ सम्बन्धको प्रतीक मानिने यो पर्व खासगरी तराई क्षेत्रका महिलाहरूले विशेष श्रद्धा र उत्साहका साथ मनाउने गर्दछन्।

जितिया पर्व मुख्यगरी तीन दिनसम्म कठोर नियम र निष्ठाका साथ मनाइन्छ। पर्वको पहिलो दिन व्रतालु महिलाहरूले जलाशय वा नदीमा स्नान गरी पवित्र भएर ‘ओठगन’ (दर खाने) गर्छन्। यस दिन चोखो खानेकुरा खाएर व्रतको संकल्प गरिन्छ र परिवारका सदस्यहरूको सुख-शान्तिका लागि कामना गरिन्छ।
पर्वको दोस्रो दिन अर्थात् अष्टमी तिथि यसको सबैभन्दा मुख्य र कठिन भाग हो। यस दिन महिलाहरूले अन्न र पानी समेत ग्रहण नगरी २४ घण्टासम्म पूर्ण ‘निर्जला व्रत’ बस्छन्। व्रतका क्रममा भगवान जितवाहन (जीतमहान) को पूजा-अर्चना गर्दै जितियाको पौराणिक कथा सुन्ने र गाउने परम्परा रहेको छ।

तेस्रो दिन (नवमी तिथि) बिहान पुनः स्नान गरी पूजापाठ गरेर विशेष परिकार, दही र सख्खर चढाउँदै पारण (व्रत समाप्त) गरिन्छ। मिथिला, थारू र तराईका अन्य विविध समुदायको मौलिक पहिचान बोकेको यो पर्वले सांस्कृतिक एकता र पारिवारिक सद्भाव बढाउन महत्त्वपूर्ण भूमिका खेलेको छ।